Psiphon မှ ပထမအကြိမ် APSIG သို့ တက်ရောက်ခြင်း

၂၀၁၆ ခုနှစ် စက်တင်ဘာ ၁၁ ရက်မှ ၁၅ ရက်အထိ၊ Psiphon သည် ထိုင်းနိုင်ငံ၊ ဘန်ကောက်မြို့တွင် ကျင်းပပြုလုပ်ခဲ့သော ပထမဆုံးအကြိမ် အာရှ ပစိဖိတ် အင်တာနက် စီမံအုပ်ချုပ်မှု သင်တန်းကျောင်း (APSIG) သို့ တက်ရောက်ခဲ့ပါသည်။

တစ်ပတ်ကြာ ဒေသတွင်းသင်တန်းကို အာရှ နည်းပညာ တက္ကသိုလ် (AIT) တွင် ကျင်းပခဲ့ပြီး အာရှပစိဖိတ်ဒေသရှိ နိုင်ငံအသီးသီးမှ ပါဝင်တက်ရောက်သူ ၃၀ ကျော်တို့သည် ဒေသတွင်း အင်တာနက် စီမံအုပ်ချုပ်မှုဆိုင်ရာ ကိစ္စရပ်များနှင့် ပတ်သက်၍ ၎င်းတို့၏ အတွေ့အကြုံနှင့် ဗဟုသုတများကို အတူတကွ မျှဝေခဲ့ကြသည်။ အင်တာနက် ပညာရေးနှင့် သုတေသန ဓာတ်ခွဲခန်း (inTERLab) မှ စီစဉ်ကျင်းပသော ငါးရက်တာ အလုပ်ရုံဆွေးနွေးပွဲတွင် နိုင်ငံတကာ အဖွဲ့အစည်းများ၊ ပညာရေး အဖွဲ့အစည်းများ၊ အရပ်ဘက် လူမှုအဖွဲ့အစည်းများ၊ အစိုးရနှင့် စီးပွားရေး ကဏ္ဍများ စသည့် နယ်ပယ်အသီးသီးမှ အဓိက သော့ချက်ဟောပြောသူများ ပါဝင်ခဲ့ကြသည်။ အဆိုပါ အဖွဲ့အစည်းများတွင် အမည်များနှင့် နံပါတ်များ သတ်မှတ်ပေးသည့် အင်တာနက် ကော်ပိုရေးရှင်း (ICANN)၊ Electronic Frontier Foundation (EFF)၊ အာရှ-ပစိဖိတ် ကွန်ရက် သတင်းအချက်အလက် စင်တာ (APNIC)၊ ကိုရီးယား အဆင့်မြင့် သိပ္ပံနှင့် နည်းပညာ တက္ကသိုလ် (KAIST)၊ OpenNet Korea နှင့် Com First India တို့ ပါဝင်ပါသည်။

ကန့်သတ်ချက်မရှိသော အင်တာနက် အကြောင်းအရာများကို ဝင်ရောက်ကြည့်ရှုနိုင်စေမည့် ယုံကြည်စိတ်ချရသော ကိရိယာတစ်ခုကို ထုတ်လုပ်သည့် ဆော့ဖ်ဝဲလ်ကုမ္ပဏီတစ်ခုအနေဖြင့် Psiphon သည် အာရှပစိဖိတ်ဒေသတွင်း အင်တာနက် အကြောင်းအရာ လွတ်လပ်ခွင့်ဆိုင်ရာ အများပြည်သူ အသိပညာ တိုးတက်စေခြင်း အပါအဝင် အင်တာနက် စီမံအုပ်ချုပ်မှုဆိုင်ရာ ကိစ္စရပ်များနှင့် ပတ်သက်၍ ၎င်း၏ အကြံပြုသုံးသပ်ချက်များကို မျှဝေခွင့်ရသည့်အတွက် အလွန်ပင် စိတ်လှုပ်ရှားခဲ့ရပါသည်။ ကျွန်ုပ်တို့၏ ဆော့ဖ်ဝဲလ်နှင့် ပတ်သက်၍ ပေးအပ်လာသော တုံ့ပြန်ချက်များကို ကောက်ယူနားလည်နိုင်ရန် သင်တန်းကျောင်းအတွင်းရှိ လက်ရှိအသုံးပြုသူများနှင့် ထိတွေ့ချိတ်ဆက်ခွင့်ရခဲ့သည့်အတွက် ကျွန်ုပ်တို့ အလွန်ဝမ်းမြောက်ခဲ့ပါသည်။ ထို့အပြင် Psiphon သည် ထိုင်း၊ ပါကစ္စတန်နှင့် ဖိလစ်ပိုင် ကဲ့သို့သော တောင်အာရှနှင့် အရှေ့တောင်အာရှ နိုင်ငံများမှ အသုံးပြုသူအသစ်များနှင့်လည်း မိတ်ဖက်ဆက်ဆံရေး တည်ဆောက်နိုင်ခဲ့ပါသည်။ သရုပ်ပြ အလုပ်ရုံဆွေးနွေးပွဲများအတွင်း Psiphon သည် လာမည့် ဆယ်စုနှစ်အတွင်း အင်တာနက် အသုံးပြုသူအသစ်များ အဆင်ပြေချောမွေ့စွာ သုံးစွဲနိုင်ရေးဆိုင်ရာ နောက်ဆုံးအစီရင်ခံစာအတွက် ပါဝင်ကူညီခဲ့ပါသည်။ ဤအစီရင်ခံစာကို ယခုအခါ apsig.asia ရှိ APSIG တရားဝင် ဝဘ်ဆိုက်တွင် ရယူဖတ်ရှုနိုင်ပြီ ဖြစ်ပါသည်။

APSIG သည် ဒေါက်တာ Kilnam Chon မှ စိတ်ကူးပုံဖော်ထားသော ရှေ့ပြေးစီမံကိန်းတစ်ခုဖြစ်ပြီး နောက်တစ်ကြိမ် APSIG ကိုလည်း ထိုင်းနိုင်ငံ၊ ဘန်ကောက်မြို့တွင်ပင် ကျင်းပသွားမည် ဖြစ်ပါသည်။
သင်၏ နောက်လာမည့် ပွဲသို့ Psiphon Inc. ကို ဖိတ်ကြားလိုပါသလား။ ကျွန်ုပ်တို့ထံ info@psiphon.ca သို့ အီးမေးလ် ပေးပို့နိုင်ပါသည်။