ការធ្វើសវនកម្មសុវត្ថិភាពថ្មីៗរបស់ 7ASecurity លើកូដរបស់ Psiphon រកឃើញថា “គ្មានចន្លោះប្រហោងសុវត្ថិភាពសំខាន់ៗឡើយ”

ជាផ្នែកមួយនៃការប្ដេជ្ញាចិត្តឥតឈប់ឈររបស់យើងក្នុងការសម្រេចឱ្យបាននូវបទដ្ឋានខ្ពស់បំផុតនៃតម្លាភាព និងសុវត្ថិភាព Psiphon បានចាត់តាំង 7ASecurity ឱ្យធ្វើការពិនិត្យឡើងវិញនូវសុវត្ថិភាពនៃមូលដ្ឋានកូដរបស់ខ្លួនទាក់ទងនឹងការកែលម្អថ្មីចំនួនបួនរបស់ Psiphon។ របាយការណ៍លទ្ធផលត្រូវបានផ្សព្វផ្សាយជាសាធារណៈ ហើយអាចចូលមើលបាននៅ៖ https://7asecurity.com/reports/pentest-report_psiphon-e.pdf។ 

ដោយប្រើប្រាស់វិធីសាស្ត្រ “white box” ដែលមានន័យថាកូដប្រភពទាំងមូលត្រូវបានផ្ដល់ជូន ក្រុមការងារសន្តិសុខបានកំណត់ស្វែងយល់ពីការប្រកាន់ខ្ជាប់របស់ Psiphon ទៅលើការអនុវត្តល្អបំផុតនៃការសរសេរកូដប្រកបដោយសុវត្ថិភាព និងផ្ដល់អនុសាសន៍ការពារតាមភាពសមស្រប ដោយផ្អែកលើការរកឃើញរបស់ពួកគេ។ ក្រុមការងារសន្តិសុខបានប្រើប្រាស់ឧបករណ៍ និងវិធីសាស្ត្រជាច្រើនលើកូដប្រភព Psiphon ទាំងអស់ និងបណ្ណាល័យភាគីទីបី។ ចរាចរណ៍បណ្ដាញក៏ត្រូវបានវិភាគផងដែរ ដើម្បីកំណត់រកវ៉ិចទ័រវាយប្រហារដែលអាចកើតមាន ការកំណត់អត្តសញ្ញាណ និងឥរិយាបថរបស់ Psiphon នៅពេលរងការវាយប្រហារ។ 

ការសន្និដ្ឋានរបស់ក្រុមការងារគឺថា៖ 

“វេទិកា Psiphon ត្រូវបានរកឃើញថាមានភាពធន់នឹងវ៉ិចទ័រវាយប្រហារជាច្រើន និងបានផ្ដល់នូវចំណាប់អារម្មណ៍រឹងមាំជារួម។ 

ចំណុចនេះឆ្លុះបញ្ចាំងយ៉ាងល្អអំពីក្រុមការងារនៅពីក្រោយដំណោះស្រាយនេះ។ 7ASecurity បានរកឃើញភាពងាយរងគ្រោះផ្នែកសន្តិសុខត្រឹមតែ 1 ប៉ុណ្ណោះ ដែលមានកម្រិតធ្ងន់ធ្ងរទាប។ ដូច្នេះ មិនមានកំហុសសន្តិសុខសំខាន់ៗណាមួយត្រូវបានកំណត់ឃើញ ក្នុងអំឡុងពេលបំពេញកិច្ចការនេះឡើយ។ ការរកឃើញចំនួន 4 ផ្សេងទៀតត្រូវបានចាត់ថ្នាក់ជាចំណុចខ្សោយ ផ្សេងៗ ហើយដូច្នេះ មិនត្រូវបានចាត់ទុកជាភាពងាយរងគ្រោះឡើយ។”

មូលដ្ឋានកូដរបស់ Psiphon គឺជាប្រភពបើកចំហ ហើយអាចចូលមើលបាននៅលើ GitHub។ ការធ្វើសវនកម្មសន្តិសុខពីមុនៗលើកូដរបស់ Psiphon អាចរកបានតាមរយៈគេហទំព័ររបស់យើង និងនៅលើប្លុក Psiphon។ 

យើងសូមថ្លែងអំណរគុណចំពោះការខិតខំប្រឹងប្រែងរបស់ក្រុមការងារ 7ASecurity ហើយយើងពិតជារីករាយដែលវិស្វករផ្នែកទន់ និងកូដប្រភពរបស់ Psiphon នៅតែបន្តទទួលបានការវាយតម្លៃខ្ពស់បែបនេះ។