Psiphon ចូលរួម APSIG លើកដំបូង

នៅថ្ងៃទី 11 ដល់ 15 ខែកញ្ញា ឆ្នាំ 2016 Psiphon បានចូលរួមក្នុងវគ្គបណ្តុះបណ្តាល Asia Pacific School of Internet Governance (APSIG) លើកដំបូង ដែលរៀបចំឡើងនៅទីក្រុងបាងកក ប្រទេសថៃ។

សាលាបណ្តុះបណ្តាលថ្នាក់តំបន់ដែលមានរយៈពេលមួយសប្តាហ៍នេះ បានប្រព្រឹត្តទៅនៅវិទ្យាស្ថានបច្ចេកវិទ្យាអាស៊ី (AIT) ដែលមានសិក្ខាកាមជាង 30 នាក់មកពីបណ្តាប្រទេសផ្សេងៗគ្នានៅអាស៊ីប៉ាស៊ីហ្វិក បានជួបជុំគ្នាដើម្បីចែករំលែកបទពិសោធន៍ និងចំណេះដឹងរបស់ពួកគេលើបញ្ហាអភិបាលកិច្ចអ៊ីនធឺណិតក្នុងតំបន់។ រៀបចំឡើងដោយមន្ទីរពិសោធន៍ស្រាវជ្រាវ និងអប់រំអ៊ីនធឺណិត (inTERLab) សិក្ខាសាលារយៈពេលប្រាំថ្ងៃនេះ មានវាគ្មិនសំខាន់ៗមកពីមជ្ឈដ្ឋានផ្សេងៗ ដូចជាអង្គការអន្តរជាតិ វិទ្យាស្ថានអប់រំ សង្គមស៊ីវិល រដ្ឋាភិបាល និងវិស័យធុរកិច្ច។ អង្គការទាំងនេះរួមមាន៖ Internet Corporation for Assigned Names and Numbers (ICANN), Electronic Frontier Foundation (EFF), Asia-Pacific Network Information Centre (APNIC), Korea Advanced Institute of Science and Technology (KAIST), OpenNet Korea និង Com First India។

ក្នុងនាមជាក្រុមហ៊ុនសូហ្វវែរដែលបង្កើតឧបករណ៍គួរឱ្យទុកចិត្ត ដែលផ្តល់លទ្ធភាពចូលប្រើប្រាស់ខ្លឹមសារអ៊ីនធឺណិតដោយគ្មានការរឹតបន្តឹង Psiphon ពិតជារំភើបយ៉ាងខ្លាំងក្នុងការចែករំលែកមតិកែលម្អរបស់ខ្លួនលើបញ្ហាអភិបាលកិច្ចអ៊ីនធឺណិត រួមទាំងការលើកកម្ពស់ការយល់ដឹងជាសាធារណៈអំពីសេរីភាពនៃខ្លឹមសារអ៊ីនធឺណិតនៅក្នុងតំបន់អាស៊ីប៉ាស៊ីហ្វិក។ យើងពិតជារីករាយក្រៃលែងក្នុងការភ្ជាប់ទំនាក់ទំនងជាមួយអ្នកប្រើប្រាស់ដែលមានស្រាប់ នៅក្នុងវគ្គបណ្តុះបណ្តាលនេះ ដើម្បីប្រមូល និងស្វែងយល់ពីមតិកែលម្អដែលបានផ្តល់ជូនទាក់ទងនឹងសូហ្វវែររបស់យើង។ លើសពីនេះ Psiphon បានកសាងទំនាក់ទំនងជាមួយអ្នកប្រើប្រាស់ថ្មីៗមកពីបណ្តាប្រទេសនៅអាស៊ីខាងត្បូង និងអាស៊ីអាគ្នេយ៍ ដូចជា ប្រទេសថៃ ប៉ាគីស្ថាន និងហ្វីលីពីន។ ក្នុងអំឡុងពេលសិក្ខាសាលាសម្តែងតួ Psiphon បានរួមចំណែកដល់របាយការណ៍ចុងក្រោយស្តីពីការសម្របសម្រួលសម្រាប់អ្នកប្រើប្រាស់អ៊ីនធឺណិតថ្មីៗក្នុងទសវត្សរ៍ក្រោយ។ របាយការណ៍នេះឥឡូវនេះមាននៅលើគេហទំព័រផ្លូវការរបស់ APSIG នៅ apsig.asia។

APSIG គឺជាកម្មវិធីសាកល្បងដែលផ្តួចផ្តើមគំនិតឡើងដោយលោកបណ្ឌិត Kilnam Chon ហើយ APSIG បន្ទាប់ក៏នឹងត្រូវរៀបចំឡើងនៅទីក្រុងបាងកក ប្រទេសថៃផងដែរ។
ចង់អញ្ជើញ Psiphon Inc. ទៅកាន់ព្រឹត្តិការណ៍បន្ទាប់របស់អ្នកទេ? ផ្ញើអ៊ីមែលមកយើងតាមរយៈ info@psiphon.ca